ДЕН СООЛУКТУ ЧЫҢДОО АДИСТЕРИ “ТАМЕКИСИЗ КӨЛ ЖЭЭК” ДЕМИЛГЕСИН ИШКЕ АШЫРА БАШТАДЫ

Ысык-Көлдөгү пансионаттар көл жээгиндеги эс алуучуларды чылым түтүнүнөн сактоого кызыкдар. Бул боюнча облустагы Ысык-Көл райондук Жалпы дарыгердик практика борборунун (ЖДПБ) Ден соолукту чыңдоо кабинетинин адиси Бермет Союзова билдирди. Ал медициналык уюмдун жетекчилигине, Чолпон-Ата шаарынын мэриясына жана жергиликтүү кеңештин депутаттарына «Тамекисиз көл жээк» кампаниясын ишке ашыруу боюнча кайрылуу жолдогонун билдирди.
“Бул демилгенин алкагында 9 кишиден турган жумушчу топ түзүлүп, ага калаа башчысы Бердибек Иманбеков, шаардык кеңештин депутаттары жана Ысык-Көл райондук Жалпы дарыгердик практика борборунун өкүлдөрү кирди. Комиссия пансионаттарды кыдырып, эс алуучу жайлардын кызматкерлерине жана эс алуучуларга түшүндүрүү иштерин жүргүздү. Иш-чаранын максатына ылайык пассивдүү тамеки чегүүнүн алдын алуу, эс алуу жайларында чылым тартчу жайларды өзүнчө, обочолонтуп жайгаштыруу, эскертүүчү тосмолорду орнотуу боюнча сунуштар берилди”, – дейт Бермет Союзова.
Жумушчу топтун ишинин жыйынтыгына ылайык атайын тамеки чегүү жайлардын уюштурулушун көзөмөлдөп туруу боюнча жума сайын байкоо жүргүзүү чечими кабыл алынды. Жалпысынан түзүлгөн жумушчу топ тарабынан 7 пансионатка, 28 эс алуучу жайдын кызматкерлерине жана 87 эс алуучуга түшүндүрүү иштери жүргүзүлүп, эки баннер жана 42 таштанды челектери үчүн атайын чаптама кагаздар таркатылды.